Wed01162019

Last updateTue, 15 Jan 2019 8am

SP Smart Slider New

නවතම පුවත්

ගෝඨාභය රාජපක්‍ෂ මහතාට එරෙහි නඩුව ජනවාරී 22 වැනිදා සිට දිනපතා විභාගයට

හිටපු ආරක්‍ෂක ලේකම් ගෝඨාභය රාජපක්‍ෂ මහතා ඇතුඵ විත්තිකරුවන් 7 දෙනෙකුට එරෙහිව නීතිපතිවරයා ගොනුකර ඇති නඩුව ජනවාරී 22 වැනිදා සිට දිනපතා විභාගයට ගැනීමට කොළඹ ත්‍රිපුද්ගල මහාධිකරණය තීරණය කරයි. එම නඩුව අද කැදවු අවස්ථාවේ ඊට අදාළ ලේඛණ නිසිපරිදි ලැබී තිබෙන බව දෙපාර්ශවයේම නීතීඥවරු අධිකරණයට දැණුම් දුන්හ.

විත්තියට ලැබිය යුතු ලේඛණ නිසියාකාරව ලැබී තිබේද යන්න පරීක්‍ෂා කිරීම සදහා ජනවාරී 03 වැනිදා නඩුව නැවත කැදවීමට තිරණය කෙරිණි. ඉකුත් රජය සමයේ මැදමුලන . ඩී. ඒ. රාජපක්‍ෂ අනුස්මරණ කෞතුකාගාරය ඉදිකිරීම සදහා රුපියල් තුන්කෝටි 39 ලක්‍ෂයක මුදලක් සාවද්‍ය ලෙස පරිහරණය කළ බවට විත්තිකරුවන්ට චෝදනා එල්ලවී තිබේ.

පාර්ලිමේන්තුව විසුරුවා හැරීමේ ගැසට් නිවේදනය බලරහිත කරන ලෙස ඉල්ලා ශ්‍රේෂ්ඨාධිකරණයට ඉදිරිපත් කළ පෙත්සම් සලකා බැලීම ඇරඹෙයි

ජනාධිපති මෛත්‍රිපාල සිරිසේන මැතිතුමා නිකුත් කළ පාර්ලිමේන්තුව විසුරුවා හැරීමේ ගැසට් නිවේදනය බලරහිත කරන ලෙස ඉල්ලා ශ්‍රේෂ්ඨාධිකරණයට ඉදිරිපත්ව ඇති පෙත්සම් සලකා බැලීම ඇරඹෙයි. අද සිට ලබන 06 වැනිදා දක්වා අඛණ්ඩව පෙත්සම විභාගයට ගැනේ.

අග විනිසුරු නලීන් පෙරේරා මහතා ප්‍රමුඛ සත් පුද්ගල විනිසුරු මඩුල්ලක් හමුවේ පෙත්සම් විභාග කිරීමට නියමිතය. එක්සත් ජාතික පක්‍ෂය. ජනතා විමුක්ති පෙරමුණ. ශ්‍රී ලංකා මුස්ලිම් කොංග්‍රසය. දෙමල ජාතික සංධානය යන දේශපාලන පක්‍ෂ පෙත්සම් ගොනුකර තිබේ. ලැබී ඇති සමස්ත පෙත්සම් සංඛ්‍යාව 13 කි. මැතිවරණය පැවැත්වීම වළක්වාලමින් ශ්‍රේෂ්ඨාධිකරණය මීට පෙර නිකුත් කළ අතුරු තහනම් නියෝගය ලබන 07 වැනිදා තෙක් බලපැවැත්වෙයි.

රාජ්‍ය ආරක්ෂාව , රට සහ පොදු ජනතාව වෙනුවෙන් වගකීම් ඉටු කිරීමට ජනපතිගෙන් රාජ්‍ය සේවයට ත්‍රිවිධ හමුදාවට හා පොලීසියට උපදෙස්

අග්‍රාමාත්‍යවරයා හා අමාත්‍ය මණ්ඩලය ධූරවල කටයුතු කිරීම අත් හිටුවාලමින් අභියාචනාධිකරණය අතුරු නියෝගයක් නිකුත් කර ඇතත් සියළුම අමාත්‍යාංශවල කටයුතු සාමාන්‍ය පරිදි පවත්වා ගෙන යන ලෙස ජනාධිපති මෛත්‍රීපාල සිරිසේන මැතිතුමා සියළුම අමාත්‍යාංශ ලේකම්වරුනට උපදෙස් දෙයි.

ජනාධිපති කාර්යාලය අද (04) පෙරවරුවේ පැවැති විශේෂ සාකච්ඡාවකදී එතුමා එම උපදෙස් ලබා දී තිබේ.

පවත්නා නීතීයට අනුකූලව මහජන සේවාවන් කිසිදු බාධාවකින් තොරව අඛණ්ඩව ඉටු කළ යුතුය.

මෙවැනි අවස්ථාවක දී රාජ්‍ය ආරක්ෂාව මෙන්ම රට සහ පොදු මහජනතාව වෙනුවෙන් සිය යුතුකම් හා වගකීම් නොපිරිහෙලා ඉටුකරන ලෙස ජනාධිපති තුමා සියළුම රාජ්‍ය සේවා ත්‍රිවිධ හමුදාවට සහ පොලීසියට නියෝග කර ඇතැයි ජනාධිපති මාධ්‍ය අංශය පවසයි.

වව්නතිව් පොලිස් නිලධාරීන් දෙදෙනාගේ ඝාතන සිද්ධියට අදාළ තවත් සැකකරුවෙකු අත්අඩංගුවට

වව්නතිව් පොලිස් නිලධාරින් දෙදෙනාගේ ඝාතන සිද්ධියට අදාළව තවත් සැකකරුවෙක් අත්අඩංගුවට ගැනේ. පොලිස් මුලස්ථානය ප්‍රකාශ කලේ කරයාකන්තිව් ප්‍රදේශයේදී ඔහු අත්අඩංගුවට ගත් බවයි. කදිරාමතම්බි ඉරාජකුමාරන් වන ඔහු හතලිස් හැවිරිදි වියේ පසුවේ.

සැකකරු වැඩිදුර විමර්ශන සදහා අපරාධ පරීක්‍ෂණ දෙපාර්තමේන්තුවට භාරදී ඇත. සිද්ධියට අදාළව මේ වන විට තවත් සැකකරුවන් දෙදෙනෙකු අත්අඩංගුවට ගෙන තිබේ.

ආහාර පනතට සංශෝධන

ආහාර පනතට නව සංශෝධන එක් කෙරේ. එය මේ වනවිට නිති කෙටුම්පත් දෙපාර්තමේන්තුවට යොමු කර තිබෙ.්. නව සංශෝධන අනුව කිරිපිටි ප්‍රවර්ධනය වැලැක්විමට නව නිති හදුන්වා දෙන බව සෞඛ්‍ය අධ්‍යක්ෂ ජනරාල් සහ ප්‍රධාන ආහාර පාලක විශේෂඥ වෛද්‍ය අනිල් ජාසිංහ මහතා පවසයි.. නව නිතියට අනුව කිරිපිටි ප්‍රවර්ධන වෙළෙද දැන්විම් පළකිරිම සදහා අදාල සමාගම් තමාගේ අනුමැතිය ලබාගතයුතු බව ඒ මහතා පැවසුවේ කොළඹ සෞඛ්‍ය ප්‍රවර්ධන කාර්යාංශයේ අද පැවති වැඩමුඵවකදිය. එම දැන්විම් පළකරන විද්‍යුත් සහ රූපවාහිනි ආයතනය අනුමැතිය ලබාගතයුතුය.
තහනමට ලක්වූ ටින් මාඵ අඩංගු බහාලුම් 86 ක් වෙළෙඳපලට නිකුත් වූ ඇති බවට පලවූ වාර්තා කෙරෙහි අවධානය යොමුකර සෙසු බහාලුම් වෙළෙඳපලට නිකුත් කිරිම වලක්වා ගැනිමට අවශ්‍ය ක්‍රියාමාර්ග ගත් බවද ඔහු සදහන් කළේය. ශ්‍රි ලංකා ප්‍රමිති ආයතනයේ සහාය ඇතිව එම පියවර ගැණිනි.

අධිකරණයේ පෙනී සිටිමට පාර්ලිමේන්තු මන්ත්‍රි රන්ජන් රාමනායක මහතාට නොතිසි

අධිකරණයට අපහාස කිරීම සම්බන්ධයෙන් කරුණු දැක්වීම සඳහා ලබන 07 වැනිදා ශ්‍රේෂ්ඨාධිකරණය හමුවේ පෙනී සිටින්නැයි පාර්ලිමේන්තු මන්ත්‍රි රංජන් රාමනායක මහතාට ශ්‍රේෂ්ඨාධිකරණය අද නොතිසි නිකුත් කලේය.

පාර්ලිමේන්තුව විසුරුවා හැරීමට අදාලව අධිකරණය පිලිබඳව ආන්දෝලාත්ම ප්‍රකාශයක් කිරීම සම්බන්ධයෙන් නිදහසට කරුණු දක්වන්නැයි රාමනායක මහතාට දන්වා තිබේ. නියෝගය නිකුත් කලේ එම ප්‍රකාශය අග විනිසුරු ප්‍රමුඛ විනිසුරු මඩුල්ල නිරීක්ෂණය කිරීමෙන් අනතුරුවය.

ශ්‍රී ලංකා ක්‍රිකට් පිලේ නවසීලන්ත සංචාරය ඇරඹේ

ශ්‍රි ලංකා ක්‍රිකට් කණ්ඩායමේ නවසීලන්ත සංචාරය ඇරඹේ. ශ්‍රී ලංකා පිල අද අලුයම නවසීලන්තය බලා පිටත්ව ගියේය. ටෙස්ට් ක්‍රිකට් තරග 2 කට සහ එක්දින තරග 3 කට කණ්ඩායම සහභාගි වෙයි. පන්දුවාර විස්සේ ක්‍රිකට් තරගයක් ද පැවැත්වේ.

දෙරට අතර පළමු ටෙස්ට් ක්‍රිකට් තරගය මේ මස 15 වැනිදා වෙලිංටන් හිදි ඇරඹේ.

ලබන ජනවාරි මාසයේ සිට ඔපෙක් සංවිධානයෙන් ඉවත් වන බව කටාර් රාජ්‍යය බලශක්ති ඇමතිවරයා කියයි.

ලබන ජනවාරි මාසයේ සිට ඔපෙක් සංවිධානයෙන් ඉවත් වන බව කටාර් රාජ්‍යය බලශක්ති අමාත්‍ය ෂාඩ් අල් කාබි මහතා නිවේදනය කරයි. කටාරය විශාල වශයෙන් තෙල් නිපදවන රටක් නොවුවද ලෝකයේ විශාලතම ස්වභාවික ගෑස් අපනයනකරු වෙයි. . ඉදිරියේදි ගෑස් කර්මාන්තයේ වැඩිදියුණු කිරිම පිළිබඳව වැඩි අවධානය යොමු කරන බව ඇමතිවරයා පැවසිය. තෙල් සැපයුම අඩු කිරිම සම්බන්ධයෙන් සාකච්ඡා කිරිමට ඔපෙක් සංවිධානය සහ රුසියාව ඇතුඵ රටවල් ගණනාවක් මේ මස 06 වැනිදා සහ 07 වැනිදා සාකච්ඡාවකට සහභාගි විමට නියමිතයි.

අමෙරිකාව සහ රුසියාව සාකච්ඡා ආරම්භ කිරීමට සූදානම්

අමෙරිකාවත් සමග සාකච්ඡා යළි ඇරඹීම සඳහා රුසියාව බලාපොරොත්තුවෙන් සිටින බව රුසියානු විදේශ අමාත්‍ය සර්ජි ලැව්රෝ මහතා පවසයි. ඒ සම්බන්ධයෙන් අමෙරිකානු ජාතික ආරක්ෂක උපදේශක ජෝන් බෝල්ටන් මහතා සමග ද සාකච්ඡා කළ බව ඔහු කියා සිටි.

ජී 20 සමුඑව අතරවාරයේදී දෙරටේ නායකයන් අතර පැවැත්විමට නියමිතව තිබු සාකච්ඡා වටය අවලංගු කෙරිණි. කෙසේ වුවත් මීලග ජී 20 රාජ්‍ය නායක සමුඑවට පෙර අමෙරිකානු රුසියානු නායකයින් හමුවනු ඇතැයි දෙපාර්ශවයේම විශ්වාසය පලවී තිබේ.

පාර්ලිමේන්තුව විසුරුවීමේ බලය ඇත්තේ ජනාධිපතිතුමාට පමණක් බව හිටපු අගවිනිසුරු සරත් එන් ද සිල්වා මහතා අවධාරණය කරයි

පාර්ලිමේන්තුව විසුරුවා හැරීමේ බලය ඇත්තේ ජනාධිපති මෛත්‍රිපාල සිරිසේන මැතිතුමාට පමණක් බව හිටපු අගවිනිසුරු සරත් එන් ද සිල්වා මහතා පවසයි.ප කඩිනම් මහ මැතිවරණයක් පවත්වන ලෙස ඉල්ලා ඊයේ සංවිධාන කර තිබූ රැලියකදී ඒ මහතා වැඩිදුරටත් පැවසුවේ රට අරාජික කිරීමේ කුමන්ත්‍රණ අනුමත කල නොහැකි බවයි.

රටේ ස්ථාවරභාවය වෙනුවෙන් නිතිය පෙනී සිටිය යුතුය. ජනාධිපතිතුමා සතු බලතල අනුව පාර්ලිමේන්තුව විසුරුවීමට රටේ ව්‍යවස්ථාවෙන් අවසර ඇතැයිද හිටපු අගවිනිසුරුවරයා මෙහිදී පෙන්වා දුන්නේය.

අධිකරණ නියෝගය සම්බන්ධයෙන් පක්ෂ විපක්ෂ මන්ත්‍රිවරු අදහස් දක්වති

කැබිනට් මණ්ඩලය අත්හිටවු බව ප්‍රකාශ කරමින් ඊයේ දින ලබාදුන් අධිකරණ නියෝගය පිළිබඳව සෑහීමකට පත්නොවන බව පාර්ලිමේන්තු මන්ත්‍රි දිනේෂ් ගුනවර්ධන මහතා කියයි. මේ පිළිබඳව අභියාචනයක් ඉදිරිපත් කිරීමට අද කටයුතු කරන බව හෙතෙම සඳහන් කලේය.

කොළඹ පැවති ප්‍රවෘත්ති සාකච්ඡාවකදී ගුනවර්ධන මහතා මේ බව පැවසීය. ඔහු වැඩි දුරටත් පැවසුවේ රටේ ස්ථාවරභාවය සඳහා මහා මැතිවරණයක් අවශ්‍ය බවයි.

මේ සඳහා අවශ්‍ය නීතිමය ක්‍රියාමාර්ග අද පෙරවරුවේ සිට නීති ක්ෂේත්‍රයේ ප්‍රවීනයන් හා එක්ව ගන්නා බව පාර්ලිමේන්තු මන්ත්‍රි සුසිල් ප්‍රේමජයන්ත මහතා පැවසීය. ජනාධිපතිතුමා නීති උපදෙස් පරිදි ඉදිරි කටයුතු සිදුකරනු ඇතැයි ද ඔහු සඳහන් කලේය.

කැබිනට් මණ්ඩලය සම්බන්ධයෙන් අභියාචනාධිකරණය ලබාදුන් අතුරු තහනම් නියෝගයෙන් පසු පාර්ලිමේන්තු මන්ත්‍රිවරුන් කිහිප දෙනෙකුම අදහස් දැක්විය. පාර්ලිමේන්තු මන්ත්‍රි රිෂාඩ් බදියුදින් මහතා පැවසුවේ අධිකරණයට ගරු කොට පාර්ලිමේන්තු බහුතරයට ගරු කොට රනිල් වික්‍රමසිංහ මහතා යළිත් අගමැති ධූරයට පත්කළ යුතු බවයි.

නීත්‍යානුකුල රජයක් නොවේ නම් එය පාර්ලිමේන්තුවට ඉදිරිපත් කරන නියමිත ක්‍රමවේදයක් ඇතැයි පාර්ලිමේන්තු මන්ත්‍රි අනුර ප්‍රියදර්ශන යාපා මහතා කියයි. ස්ථාවර නියෝගවලට අනුව කටයුතු කරමින් විශ්වාසභංග යෝජනාවක් ගෙන ආ යුතුය. වැරදි ක්‍රම ඔස්සේ ගෙනඑන විශ්වාසභංග පිළිගත නොහැකි බව ඔහු පෙන්වා දෙයි.

අප බලාපොරොත්තු වු අයුරින් අධිකරණය වග උත්තරකරුවන්ට නොතිසි නිකුත් කිරීමට තීරණය කළ බව පාර්ලිමේන්තු මන්ත්‍රි උදය ගම්මන්පිල මහතා කිවේය. එහෙත් බලාපොරොත්තු නොවු අයුරින් අගමැති ප්‍රමුඛ ඇමති මණ්ඩලය අත්හිටුවීමේ නියෝගයක් ලබාදි තිබේ. කෙසේ වුවත් අධිකරන තීන්දුවට ගරු කරන බව ද ඔහු කියා සිටී.

රනිල් වික්‍රමසිංහට යලිත් අගමැතිධූරය ලබා නොදෙන බව ජනාධිපතිතුමා යලි තහවුරු කලා - මන්ත්‍රී ලක්ෂ්මන් කිරිඇල්ල

ජනාධිපති මෛත්‍රිපාල සිරිසේන මැතිතුමා සහ එක්සත් ජාතික පක්ෂ මන්ත්‍රීවරු අතර ඊයේ පැවති සාකච්ඡාද අසාර්ථක වූ බව ලක්ෂ්මන් කිරිඇල්ල මන්ත්‍රිවරයා පවසයි. පාර්ලිමේන්තුවේ දෙසිය විසි පස් දෙනාගේම කැමැත්ත රැගෙන පැමිණියද රනිල් වික්‍රමසිංහ මහතාට අගමැතිධූරය ලබා නොදෙන බව ජනාධිපතිතුමා එම රැස්වීමේදී යලි තහවුරු කර ඇත.

ඊයේ රාත්‍රියේ ජනාධිපතිතුමා සමග පැවති හමුවට එක්සත් ජාතික පක්ෂ ප්‍රබලයෝ රැසක් සහභාගී වූහ. ජනාධිපති කාර්යාලයේදී හමුව පැවැත්විණ.

ශ්‍රී ලංකා නිදහස් පක්ෂ මහ සම්මේලනය අද

ශ්‍රි ලංකා නිදහස් පක්ෂ නියෝජිත මහා සම්මේලනය පක්ෂ සභාපති ජනාධිපති මෛත්‍රිපාල සිරිසේන මැතිතුමාගේ ප්‍රධානත්වයෙන් සුගතදාස ගෘහස්ථ ක්‍රිඩාංගණයේදී අද පැවැත්වේ. අද පස්වරුවේ පැවැත්වෙන මෙම සම්මේලනයේ දී ජනාධිපතිතුමා විශේෂ ප්‍රකාශයක් ද සිදු කරයි. ශ්‍රී ලංකා නිදහස් පක්ෂ මධ්‍යම කාරක සභාවේදී පැමිණි එකගතාවකට අනුව නියෝජිත මහා සම්මේලනය පැවැත්වේ.

දිස්ත්‍රික් බලමණ්ඩල ක්‍රියාකාරීන් . ශ්‍රී ලංකා නිදහස් පක්ෂ මැති ඇමතිවරුන් . සහ ආසන සංවිධායකවරුන් මෙම සමුඵවට සහභාගි වන බව ජනාධිපති මාධ්‍ය අංශය කියයි. වත්මන් දේශපාලන තත්ත්වය හා පක්ෂයේ ඉදිරි ගමන් මග සම්බන්ධයෙන් ජනාධිපතිතුමා මෙහිදී කරුණු දක්වයි.

පක්ෂ සියල්ල රැස්කර ඉන් ලැබෙන අනුමැතිය පරිදි ඡන්දයක් පැවැත්වීමට සුදානම් බව එක්සත් ජාතික පක්ෂ නායකයා කියයි

රටට සුදුසු අගමැතිත් කැබිනට් මණ්ඩලයත් තමා ඇතුඑ එක්සත් ජාතික පෙරමුණේ කැබිනට් මණ්ඩලය බව එක්සත් ජාතික පක්ෂ නායක රනිල් වික්‍රමසිංහ මහතා කියයි. මේ වන විට සංචාරක ක්ෂේත්‍රය කඩා වැටී ඇත බඩු මිල ඉහළ ගොස් තිබේ.

ව්‍යවස්ථාව අනුව පාර්ලිමේන්තු බහුතරය ඇති කෙනා අගමැති හා රජය බවට පත්විය යුතු යැයි ඔහු ගාල්ලේ පැවති රැස්වීමකදී කිවේය. පක්ෂ සියල්ල රැස්කොට ඔවුන්ගේ අනුමැතිය පරිදි ඡන්දයක් පැවැත්විමට සුදානම් බව ද වික්‍රමසිංහ මහතා සඳහන් කලේය.

කැබිනට් මණ්ඩලය අත්හිටවු බවට අභියාචනාධිකරණය දුන් අතුරු තහනම් නියෝගයට එරෙහිව ශ්‍රේෂ්ඨාධිකරණයට අභියාචනයක් අද ඉදිරිපත් කරන බව මහින්ද රාජපක්ෂ මහතා කියයි

කැබිනට් මණ්ඩලය අත්හිටවු බවට අභියාචනාධිකරණය ලබාදුන් අතුරු තහනම් නියෝගයට එරෙහිව අද ආරම්භක පැයේදිම ශ්‍රේෂ්ඨාධිකරනය වෙත අභියාචනයක් ඉදිරිපත් කරන බව පාර්ලිමේන්තු මන්ත්‍රි මහින්ද රාජපක්ෂ මහතා පවසයි.

ආණ්ඩුක්‍රම ව්‍යවස්ථාවේ අර්ථ නිරූපනය කිරීමේ සහ ඊට අදාල අවසාන තීන්දුව ගැනිමේ පරම අයිතිය ව්‍යවස්ථානුකූලව පැවරී ඇත්තේ ශ්‍රේෂ්ඨාධිකරණයට බව ඔහු නිකුත් කළ නිවේදනයේ දැක්වේ.

විදේශ න්‍යාය පත්‍රවලට හා චින්තනයන්ට අනුව ක්‍රියා කරන මෙරට ඇතැම් නායකයන්ට ඌව වෙල්ලස්ස අරගලයේ පාඩම කියා දිය යුතු යැයි ජනාධිපතිතුමා පවසයි

මෙරට ඇතැම් නායකයන් විදේශ න්‍යාය පත්‍රවලට හා විදේශ චින්තනයන්ට අනුව ක්‍රියාකරමින් සිටින බව ජනාධිපති මෛත්‍රිපාල සිරිසේන මැතිතුමා පවසයි. එවැනි අයට ඌව වෙල්ලස්ස අරගලයේ පාඩම කියාදිම ජනතාවගේ වගකිම බව එතුමා පෙන්වා දෙයි. ඌව වෙල්ලස්ස නිදහස් අරගලයේ දෙසියවස් සැමරුම් ජාතික සමුලුව අමතමින් එතුමා මේ බව කිවේය. කොළඹ බණ්ඩාරනායක අනුස්මරණ ජාත්‍යන්තර සම්මන්ත්‍රණ ශාලාවේ එය පැවැත්වුණි
අගමැති මහින්ද රාජපක්ෂ මහතා ඇතුලු තවත් මැති ඇමතිවරු ද මේ අවස්ථාවට එක්වුහ. ජනාධිපති ලේකම් කාර්යාලය හා කැළණි විශ්ව විද්‍යාලයේ ජනසංනිවේදන අංශය මෙය සංවිධානය කර තිබුණි.

පුජ්‍ය දඹර අමිල ස්වාමීන් වහන්සේට ලිට්රෝ ගෑස් සමාගමෙන් දුන් මුදලට අදාල රිසිට්පත හදුනා ගැනේ

පාර්ලිමේන්තුවේදී සිදුකළ වැය ශීර්ෂ කපාහැරීමේ යෝජනාව ව්‍යවස්ථාවට පටහැනි බව අමාත්‍ය බන්දුල ගුවර්ධන මහතා කොළඹ ඊයේ පැවති මාධ්‍ය හමුවක දී කීවේය.
පුජ්‍ය දඹර අමිල හිමියන් ලිට්රෝ ගෑස් සමාගමේ මුදල් අවභාවිත කළ බවට තොරතුරු අනාවරණය වී ඇතැයි පෙන්වාදුන් ගුනවර්ධන මහතා ඒ පිළිබඳව ද අදහස් දැක්වීය.
පසුගිය කාලයේ ලිට්රෝ ගෑස් සමාගමේ සහ විවිධ ආයතනවලින් වරදාන වරප්‍රසාද ලබාගත් විවිධ පාර්ශවයන් පිලිබදව හෙලිදරව් වන බව පාර්ලිමේන්තු මන්ත්‍රි කාංචන විජේසේකර මහතා පවසයි.
මේ අතර පුජ්‍ය දඹර අමිල හිමියන්ට ලිට්රෝ ගෑස් සමාගමෙන් ලබා දුන් මුදලට අදාල රිසිට්පත ලිට්රෝ ගෑස් සමාගමේ මුල්‍ය පාලක විවෘත අධිකරණයේදී හදුනා ගනු ලැබිය. හිටපු ජනාධිපති කාර්ය මණ්ඩල ප්‍රධානියෙකු වන ගාමිණි සෙනරත් මහතා ඇතුඵ 4 දෙනෙකුට එරෙහිව ගොනු කර ඇති නඩුවේ සාක්ෂි විමසීම ඊයේ කොළඹ ස්ථිර ත්‍රිපුද්ගල මහාධිකරණයේදී ආරම්භ වු අවස්ථාවේදී එම හදුනා ගැනීම සිදුවිය. නඩුවේ වැඩිදුර සාක්ෂි විභාගය දෙසැම්බර් 7 වැනිදාට කල් තැබුණි.

ස්පාඤ්ඤයේ මැඩ්රිඩ් අගනුවරට පැරණි මෝටර් රථ ඇතුඵ වීම තහනම් කෙරේ

වායු දුෂණය අඩු කිරීමේ අරමුණින් ස්පාඤ්ඤ්යේ මැඩ්රිඩ් අගනුවර පැරණි මෝටර් රථ ධාවනය තහනම් කිරීමට තීරණය කෙරේ.  මේ යටතේ වායු දුෂණය සියයට 40 කින් අඩු කිරීම අපෙක්ෂාවයි.  නගරයට ඇතුඵ වීමට පෙර මෝටර් රථ විශේෂ පරිීක්ෂාවකට ද ලක් කෙරේ.  අදාල නීති මාලා කඩ කරන රියදුරන්ට ඩොලර් 80 ක දඩයක් ගෙවීමට සිදු වෙයි.  නගරය තුල පාපැදි ධාවනය වැඩි කිරීමේ අටියෙන් වාහන සදහා නව නීති මාලා හදුන්වා දී ඇත.  මැඩ්රිඩ් නගර කවුන්සිලය එය ක්‍රියාත්මක කරයි.  ඊයේ ක්‍රියාත්මක වු මෙම නව නීතිය හේතුවෙන් නගරයට ඇතුඵ වීමට උත්සාහ කළ පැරණි මෝටර් රථ සියයට 20 ක් පමණ අඩු කිරීමට හැකිවී තිබේ.  දෙමුහුන් වර්ගයේ මෝටර් රථ පරිසරකාමි ලෙස සදහන් නම් ඒවාට ඇතුඵ විය හැකිය.

ශ්‍රව්‍යාබාධිත 20 යි 20 ලෝක කුසලානය ශ්‍රිී ලංකාවට

ඕවර් 20 යි 20 ශ්‍රව්‍යාබාධිත ලෝක ක්‍රිකට් කුසලානය ජය ගැනීමට ශ්‍රීි ලංකාව සමත් වෙයි.  ඉන්දියාවේ නවදිල්ලි නුවර පැවති අවසන් තරගයේ දී සත්කාරක ඉන්දීය කණ්ඩායම පරාජය කරමින් ලකුණු 36 ක ජයක් වාර්තා කිරීමට ශ්‍රිී ලංකාව සමත් විය.

වයස අවුරුදු 11 න් පහල අන්තර් පාසල් බැඩ්මින්ටන් තරගාවලිය කුරුණැගලදී

ශ්‍රී ලංකා පාසල් බැඩ්මින්ටන් සංගමය සංවිධාන කරන වයස අවුරුදු 11 න් පහල අන්තර් පාසල් බැඩ්මින්ටන් තරගාවලිය කුරුණැගල බෝයගනේ යුද හමුදා ගෘහස්ථ ක්‍රිඩාගාරයේදී සහ වෙලේගෙදර ක්‍රිඩාංගනයේ ගෘහස්ථ ක්‍රිඩාගාරයේ අද සිට දෙසැම්බර් පළමුවැනිදා දක්වා පැවැත්වේ. තරගාවලිය සදහා දිවයිනපුරා පාසල් 120 ක් නියෝජනය කරමින් ක්‍රිඩක ක්‍රිඩිකාවෝ 1400 කට අධික පිරිසක් සහභාගී වෙති.