Sun11182018

Last updateSat, 17 Nov 2018 9am

Business News

අලුත් අවුරුදු සමයේ ලක් සතොස ආයතනයට රුපියල් කෝටි 400 ක ආදායමක්

අලුත් අවුරුදු සමයේ ලක් සතොස ආයතනය රුපියල් කෝටි 400 ක ආදායමක් උපයා ගැනීමට සමත් වෙයි.  එය ලක් සතොස මෙතෙක් ලද වැඩිම ආදායම බව කර්මාන්ත හා වාණිජ කටයුතු අමාත්‍යංශයේ අධ්‍යක්ෂ ඉන්දිකා රණතුංග මහත්මිය කියයි.  අවුරුදු සමයේ ලක් සතොස පාරිභෝගිකයන් සදහා සියයට 40 ක වට්ටමක් ලබා දුන් අතර එහි ප්‍රතිඵලයක් ලෙස වැඩි පාරිභෝගික පිරිසක් අත්‍යවශ්‍ය භාණ්ඩ මිලදී ගැනීමට එහි පැමිණියහ.  අවුරුදු සමයේ වැඩි දින ගණනක් ලක් සතොස ශාඛා විවෘත කර තැබිණි.  ලක් සතොස අලෙවි කළ භාණ්ඩ සම්බන්ධයෙන් පාරිභෝගිකයන්ගෙන් කිසිදු පැමිණිල්ලක් ලැබි නැතැයි ද අධ්‍යක්ෂවරිය ජාතික ගුවන් විදුලියට පැවසුවාය. අවුරුදු සමයේ කලට වේලාවට භාණ්ඩ රැස්කර තබාගෙන ඒවා නිසි පරිදි බෙදා හැරීමට ලක් සතොස ක්‍රියා කළේය.

මේ වසරේ මෙරට දළ නිල සංචිත ප්‍රමාණය පහතට

පසුගිය වසර අවසන්වන විට ඇමරිකානු ඩොලර් බිලියන 8 ක්ව පැවති මෙරට දළ නිල සංචිත ප්‍රමාණය මේ වසරේ ජනවාරි අවසන් වන විට ඩොලර් බිලියන 7 යි දශම 7 ක් දක්වා පහත වැටී ඇති බව ශ්‍රී ලංකා මහ බැංකුව පවසයි. එය ආනයනික මාස 4 කට පමණ ප්‍රමාණවත් වේ. එම මාසය තුළදී ආසියානු නිෂ්කාශන සංගමයට ගෙවීමට නියමිත වාරික ගෙවීම් මෙම තත්ත්වයට මූලික හේතුව බව මහ බැංකුව පෙන්වා දෙයි.

මේ වසරේදී මෙට්‍රික්ටොන් අනුදහසක ලුණු නිෂ්පාදනයක්

මේ වසරේදී මෙට්‍රික්ටොන් අනුදහසක ලුණු නිෂ්පාදනයක් අපේක්ෂා කරන බව ලංකා ලුණු සමාගමේ සභාපති අයුබ් ඛාන් මහතා කියයි.  මෙරට වාර්ෂික ලුණු අවශ්‍යතාව මෙට්‍රික්ටොන් එක්ලක්‍ෂ විසිදහසකි.  ඉන් මෙට්‍රික්ටොන් හැත්තෑදහසක් සමාගම නිපදවයි.  තවත් මෙට්‍රික්ටොන් විසිදහසක් පෞද්ගලික ආයතනයක් නිපදවයි.  ඉදිරියේදී ලුණු ආනයනය අත්හිටුවීම අරමුණ බවද සභාපතිවරයා කියයි.

එලවලු තොග මිල ගණන් ජංගම දුරකතනයෙන්

කෘෂිකාර්මික ක්ෂේත්‍රයේ නියුතු ගොවින් හා වෙළෙදුන්ට එදිනෙදා පවතින එලවලු මිල ගණන් ලබාදිමේ වැඩපිලිවෙලක් කොළඹ හෙක්ටර් කොබ්බෑකඩුව ගොවි කටයුතු පර්යේෂණ හා පුහුණු කිරිමේ ආයතනය අරඹයි. ඒ අනුව මොබිටෙල් ජංගම දුරකතන ජාලයකින් කෙටි දුරකතන අංක 6666 ඇමතිමෙන් දවසේ පැය 24 පුරා වෙළෙදපලේ එලවලු තොග මිල ගණන් ලබාගත  හැකිබව එම ආයතනයේ අලෙවි ආහාර ප්‍රතිපත්ති හා කෘෂි ව්‍යාපාර අංශයේ ප්‍රධානි ඩබ්ලිව් එච් ඩි ප්‍රියදර්ශන මහතා කියයි.  පිටකොටුව තොග වෙළෙදපල සහ දඹුල්ල කටුගස්තොට . තඹුත්තේගම. නොරොච්චෝලේ. නුවරඑළිය. කැප්පෙටිපොල. මිගොඩ ආර්ථික මධ්‍යස්ථානවල පවතින එලවලු වර්ග 23 ක තොග මිල ගණන් ගොවින්ට වෙළෙදුන්ට හා පාරිභෝගිකයන්ට එමගින් ලබාගත හැකිය. එලවලු අස්වනු නෙලන අවස්ථාවේදිම තොග වෙළෙදපල වල මිල ගණන් දැනගැනිමට හැකිවිමෙන් තම නිෂ්පාදන ඉහලම  මිලකට අලෙවි කර ගැනිමට ගොවින්ට හැකිවන බව ප්‍රියදර්ශන මහතා පෙන්වා දෙයි

ශ්‍රි ලංකා ගුවන් සමාගම රුපියල් බිලියන 126 කට වැඩි ආදායමක්

නිමාවු මුල්‍ය වර්ෂය තුලදී ශ්‍රි ලංකා ගුවන් සමාගම රුපියල් බිලියන 126 කට වැඩි ආදායමක් වාර්තාකර තිබේ.  එම සමාගමේ වසර 38 ක ඉතිහාසයේ ලැබු ඉහළම ආදායම මෙයයි.  මේ සඳහා නව ගමන්වාර කිහිපයක් ද බලපෑවේය.  විශේෂයෙන් මාලදිවයිනේ ගාන් දුපත්. හයිද්‍රාබාද්. මොල්බෝන් දක්වා ක්‍රියාත්මක ගුවන් මෙහෙයුම් ද ඊට සැලකිය යුතු දායකත්වයක් ලබාදි තිබේ